XXVI FESTIVAL INTERNACIONALDE TÍTERES DE REDONDELA

Dende a Asociación Xente Titiriteira queremos informar de que o XXVI Festival Internacional de Títeres de Redondela. Memorial Juanjo Amoedo-2025, celebrarase do 12 ao 18 de maio.

A finais dos anos 90 Juanjo Amoedo como presidente da Asociación Veciñal de Redondela, iniciou os primeiros trámites necesarios para celebrar o primeiro Festival Internacional de Títeres de Redondela pero un lamentable accidente truncou os seus desexos.

Tras a súa morte, diferentes colectivos da vila xuntáronse e decidiron continuar coa idea inicial de Juanjo e fundaron a Asociación Xente Titiriteira co único obxectivo de celebrar un Festival de Títeres en memoria de Juanjo Amoedo.

No ano 2000 celébrase a primeira edición do Festival, aínda feita en pesetas, e con esas vimbias que lle deron unha estrutura organizativa e un posicionamento artístico cunha maxia que xa auguraba un evento cultural necesario.

Se pechamos os ollos aínda podemos ver esas primeiras edicións levadas a cabo con mimo e cuns equipos de traballo moi comprometidos, implantando o Festival como un referente.

Dende entón xa pasaron máis de 25 anos… agora temos por edición máis de 13 escenarios, 70 representacións, 30 compañías convidadas e cunha media de 40000 espectadores/as, converténdose no Festival máis importante de Galicia e nun dos mellores considerados do país.

Un acontecemento, un encontro,  unha festa da diversidade que xa vén arroupada por un público interxeneracional onde os nenos/as que asistiron ás primeiras edicións levan agora aos seus fillos/as, nese ciclo vital que transcorre nun carto de século.

Só podemos dicir grazas.

Grazas ao público por asistir de maneira entusiasta en cada edición dándolle ese sentido cerimonial que ten a representación escénica.

Grazas a todos os equipos de traballo pola súa xenerosidade e o seu compromiso.

Grazas ao tecido comercial de Redondela por crer en nós.

Grazas ao Concello de Redondela por contribuír nesta andaina ano a ano.

Grazas a Deputación, Agadic e Ministerio de Cultura por crer neste proxecto.

Queremos presentar tamén o nosa simpática “serea”,  a nova personaxe 2025 que vén ilustrar esta XXVI edición, creación do noso querido Pablo Pastor, que leva xa 26 anos dándolle ao Festival esa personalidade única.

Podemos confirmar xa a presenza de espectáculos e compañías chegadas das máis diversas procedenzas: Italia, Arxentina, Brasil, Chile, Portugal, Madrid, Cataluña, Andalucía, Aragón ou Galicia.

Este ano faremos unha programación especial de rúa os días 17 e 18 de maio.

O Festival Internacional de Títeres de Redondela. Memorial Juanjo Amoedo é o reflexo do esforzo colectivo dun pobo por difundir e gozar do Teatro de Títeres.